Во архивата на нашето училиште се чуваат многу вредни моменти од неговата историја. Едно такво сведоштво е и видеото снимено во 2009 година во кое се забележани искрени разговори и сеќавања на поранешниот директор, стручната служба и дел од наставниците кои тогаш веќе биле пензионери, но со голема љубов зборувале за годините поминати во наставничката професија.
Видеото е снимено од локалната телевизија ТВ Вис Струмица, по повод одбележувањето на 65 години од наставата на македонски јазик во ООУ „Маршал Тито“ Струмица. Во таа пригода поранешните вработени биле поканети повторно да го посетат училиштето и да присуствуваат на свечена приредба подготвена од учениците.
Со искрена радост и носталгија Илија Николов, Елена Василева, Кристина Тренчева, Ангелина Мудинова, Живка Смилкова и Аница Тасева се потсетуваат на времето кога училниците биле нивно секојдневие, на генерациите ученици што ги воспитувале и на многуте моменти што ја прават наставничката професија посебна. Нивните зборови се исполнети со топлина, гордост и благодарност за можноста да бидат дел од образованието на толку многу млади луѓе.
Денес, години подоцна, навраќајќи се на ова видео, повторно ги оживуваме тие спомени и им оддаваме почит на луѓето кои со својот труд и посветеност оставиле длабока трага во развојот на ООУ „Маршал Тито“ Струмица. Нивната љубов кон наставата и училиштето останува инспирација за новите генерации наставници и ученици.
