Историјат

• Промена на наставниот јазик: По ослободувањето на нашата земја од фашистичка окупација во октомври 1944 година, и формирањето на првото македонско училиште во оваа зграда за прв пат се слушна настава на македонски мајчин јазик. Тоа било период на големи промени (по завршувањето на Втората светска војна) кога македонскиот јазик конечно бил воведен како официјален наставен јазик во училиштата низ земјата.

Уште во 1944 година училиштето го добива името „Маршал Тито“, при што првиот раководител е Борис Нецев.

Токму во оваа зграда се одржани првите подготвителни семинари за учители од страна на Кирил Божинкочев и Христо Бајрактаров.

• Улога на зградата: Веднаш потоа ова училиште станува жариште на просветувањето на градот Струмица. Се одржувале курсеви за описменување на возрасното население. Се свикале првите изборни конференции за раководство на НОМСМ, АФЖ, Народниот фронт. Се организирале првите собири на избирачи за кандидирање на народните одборници, исто така и народни пратеници при што се спровеле и изборите. Во тие свечени денови училиштето било китено со знамиња и пароли. Оваа зграда е единствена во овој дел на градот каде историски настани се случувале во неа.

• Средношколски период: Во делови од периодот 1944–1947 во зградата била сместена и гимназијата „Јане Сандански“ така што објектот имал и функции на средношколски простор во повоените години.
Училиштето од основно прераснува во осмолетка, а потоа и во гимназија. Од него се одвоија сегашното основно училиште „Сандо Масев“ и „Моша Пијаде“(денес Видое Подгорец), а потоа и гимназијата со економски паралелки „Јане Сандански“.

Со новиот начин на управување во училиштето бил формиран првиот Совет на училиштето и прв претседател бил Александар Костов. Во следниот мандат Анче Саздова и Васил Гунчев.

Првиот управен одбор е формиран 1962 година и првиот претседател бил Стојан Христов.

Првиот раководител на училиштето е Борис Нецев 1944-1946г, по него Илија Ричлиев 1946/47. Во 1948 година за раководител се назначува Танка Маркова, и по нејзиното одење како повереник на просветата се назналува Васил Влахов. По замената на поверенството како раководител пак се враќа Танка Маркова која останува се до 1955/56год. Се до тоа време училиштето било основно, и со прирастот на учениците се јавува потреба за отварање на осмолетка и таа се формира во 1955/56година, а за управите се назначува Горги Манчев, професор по хемија.

Во 1962 година се формира првата младинска катедра за членовите на младинскиот актив при ова училиште.

Во 1956/57 до 1958/59 за раководител се назначува Никола Кацарови, а во периодот 1959/60 за раководител повторно се назначува Васил Влахов.

• Развој и модернизација (современи настани и проекти)
Училиштето во современиот период работи како матично училиште со подрачни училишта во Рич и Попчево (од учебната 2025-2026 во мирување) и е вклучено во општинските проекти и годишни програми за развој. Последните годишни оперативни документи (Годишна програма 2025/2026) се достапни на овој веб сајт и покажуваат планови за наставни активности, стручно усовршување и проекти.

• Педагогија, јазици и организирање на наставата
Двојазично образование: Денес наставата во ООУ „Маршал Тито“ Струмица се одвива на два наставни јазика: македонски и турски. Наставата на турски јазик се изведува во дел од паралелките од прво до петто одделение во матичното училиште во Струмица, додека наставата на македонски јазик ги опфаќа сите одделенија, од прво до деветто. Ова двојазично организирање претставува една од посебните и препознатливи одлики на училиштето кое со години негува почит и разбирање меѓу различните заедници.
Училиштето учествува во проекти и добри практики (во наставната и воспитната работа), наставниците од училиштето се учесници/автори на методички практики и проекти за унапредување на предучилишното и основното образование.