Со голема радост и гордост ја споделуваме веста дека видеото на нашето училиште освои прво место од жирито во рамките на проектот „Направи забава на батерии“ од Нула отпад со што ја добивме и највисоката награда во износ од 30.000 денари.
Видеото е посветено на подигање на еко-свеста, со посебен фокус на важноста од правилно собирање и рециклирање на батерии, како мал, но значаен чекор во заштитата на животната средина. Преку креативен пристап и силна порака испративме јасен апел за поголема грижа кон природата.
На видеото работеа професорката по македонски јазик – Ѓургица Костадиновска и професорката по биологија – Анета Крстова, кои со својата посветеност и креативност придонесоа за реализацијата на идејата и пренесувањето на пораката. За снимањето и монтажата беше задолжена Стојне Карадакоски која го обликуваше видеото во неговата финална форма.
Искрена благодарност упатуваме до сите колеги кои дадоа свој придонес во подготовката на видеото. Посебна благодарност до нашата директорка Ленче Чиркова за поддршката и довербата, како и до колегите Никола Ристов и Ивана Крстова кои помогнаа во уредувањето на сцените и ентериерот со што видеото доби уште посилен визуелен печат.
Ова признание е голема мотивација да продолжиме со активности кои ја поттикнуваат еколошката свест и одговорноста кон животната средина. Горди сме што преку заедничка работа успеавме да испратиме важна порака дека грижата за природата започнува од секој од нас.
