И овој октомври нашето училиште го обоивме во розово, потсетувајќи на важноста на грижата за женското здравје, подигнувањето на свеста и навремената превенција.
По тој повод, ученичките од VI одделение учествуваа во едукативна работилница под менторство на професорката по биологија Анета Крстова.
Целта на работилницата беше да се поттикнат информираноста, отворениот разговор и грижата за сопственото здравје уште од најрана возраст. Во текот на работилницата разговаравме за физичките и психичките промени што се случуваат во пубертетот кај девојчињата, како и за начините на кои тие полесно можат да ги разберат и прифатат промените низ кои минуваат.
Посебно внимание посветивме на симболиката на розовата панделка, која претставува симбол на поддршка и борба против ракот на дојката, како и на значењето на редовната грижа за здравјето и навремената превенција на заболувањата кај жените. Преку ваквите активности, нашето училиште продолжува да ја негува свеста дека образованието не значи само стекнување знаења, туку и развивање здрави навики, самодоверба и одговорност кон сопственото тело.
Секоја девојка заслужува да расте информирана, сигурна и подготвена да се грижи за себе.
