Во пријатна и инспиративна атмосфера во нашето училиште успешно беше реализирана работилница посветена на развивање на почитта, толеранцијата и соживотот меѓу учениците од различни културни и верски средини.
Преку работилницата на тема „Спој на мултикултури и прифаќање на различни култури“, учениците имаа можност да ги запознаат и споредат традициите, симболиката и вредностите на двата големи верски празници – Велигден и Рамазан Бајрам. Преку разговор и заедничка дискусија тие открија многу сличности, но и уникатни разлики што ги прават овие празници посебни.
Особено впечатлив дел од работилницата беше активноста „Вкусот на традицијата“, каде учениците дегустираа традиционална велигденска храна и разговараа за значењето на празничната трпеза. Воедно, ги споделија и обичаите поврзани со Рамазан Бајрам, при што се поттикна меѓусебно разбирање и почитување на културните вредности.
Во рамки на креативниот дел учениците изработија заеднички проект со пораки за толеранција и соживот, како и кратки објаснувања за значењето на двата празника. Активностите како вапцање јајца, цртање и изработка на пораки ја поттикнаа нивната креативност, тимска работа и емпатија.
Оваа работилница остави силен впечаток кај учениците,кои преку практична работа и дружење ја согледаа важноста на прифаќањето на различностите и негувањето на заедничките вредности. Уште еднаш се потврди дека училиштето не е само место за учење, туку и простор каде се градат мостови на пријателство, разбирање и љубов меѓу културите.
