Во свечена и пријатна атмосфера ООУ „Маршал Тито“ го одбележа големиот јубилеј – 100 години од своето постоење и успешно работење.
По повод патрониот празник на училиштето беше организирана пригодна свеченост на која присутните имаа можност да уживаат во богата културно-уметничка програма подготвена од учениците и наставниците. Настанот го водеше наставничката Савета Андонова, која низ програмата ги претставуваше настапите и учесниците.
На присутните им се обрати директорката Ленче Чиркова, која зборуваше за долгогодишната традиција на училиштето, за генерациите ученици и наставници кои оставиле белег низ изминатиот век, како и за значењето што училиштето го има во образовниот и општествениот живот на градот.
Во текот на свеченоста беа изведени песни, рецитали, драматизација и други музички и сценски точки. Беа презентирани и видео материјали со архивски снимки, интервјуа на поранешни вработени и моменти кои внесоа многу емоции и ја направија прославата уште посебна.
На наставникот по ликовна уметност Ристо Обрадов и одделенскиот наставник Инта Мустафова им беа доделени признанија за нивниот долгогодишен работен стаж во училиштето.
На настанот присуствуваа и градоначалникот Петар Јанков заедно со советници од Општина Струмица, директори од повеќе основни и средни училишта, наставници, родители, ученици и бројни гости.
Специјален гостин беше и познатиот водител Ѓорѓи Калајџиев, како поранешен ученик во „Маршал Тито“ Струмица, тој на духовит начин пред присутните евоцираше спомени од своето основно образование и потсети на едни минати времиња во кои важеа поинакви правила.
Со овој значаен јубилеј, ООУ „Маршал Тито“ Струмица уште еднаш потврди дека претставува важен дел од образованието и традицијата на градот, продолжувајќи со посветеност да воспитува и образува нови генерации ученици.
